Lawan Jeme Dusun

Lum lame ni udim balik njak undangan rumah kawan, Pak Beluk singgah makan di warung. Maklum, pas di undangan tadi kenan ngambik dikit. Jadi kenan masih lapagh nian.

Singkat cerite, karne perut lah lapagh nian, pas sampai warung tu kenan langsung tergesa-gesa mesan nasi plus ayam goreng.

Ndik lame, pelayan langsung ngantatkah ayam goreng ye utuh sikuk ke hadapan Pak Beluk. Anye ndik lame itu, pelayan ngulang agi sambil tergesa-gesa.

"Maaf nian wan, salah tepik ayam ni bukan pesanan kamu. Anye pesanan pelanggan ye lain," kate pelayan.

Anye saking lapagh, Pak Beluk tetap makse bahwe ayam tu punye die. Ndik lame, ade jeme besak tinggi betato pule ndatangi meja Pak Beluk.

"Hui!!! Lah padek nian kaba, jangan memecam kaba mun makan ayam ini. Tape kina ye kaba anukah dengan ayam tu, mangke kaba ke anukah pule luk itu. Amun kaba gigit ketingnye, ku gigit pule keting kaba. Kalu kaba tetak liaghnye, mangke ku tetak pule liagh kaba tu," kate Lanang Betato tu dengan muke marah nian.

Nginak lanang itu becancung, Pak Beluk masih diam tula sambil tersenyum nyindir.

"Cube kela amun berani nian," kate Pak Beluk sambil njilat buntut ayam ye lah udim di goreng tu.

Nginak Pak Beluk luk itu, langsung nyengir Lanang Betato tadi. Udim tu langsung larat.

"Wai buyan lanang itu, salah kicik pule aku ni tadi. Sape ke tahan ndak njilat butut," kate Lanang Betato sambil kisit.

"Hahaha mane keberani kamu melawan jeme dusun. Tape die luk padek nian ni tadi. Besak badan saje karai itu. Hahahaha," uji Pak Beluk pede sambil terus makan ayam besak tu. *