Pehaman Bangai

PAK BELUK tampak purik nian, sebab die lah sejam lebih nunggu kekantinnye. Raban tu belum juge datang, jelas ini melisit njak janji awal. Lah hampir sejam setengah, mpai raban tu datang ke badah ye dijanjikan. Pak Beluk nampak purik nian, kenan dide njawab ketike ditegur Ujang Kericup, Merin, Taun dan Ujang Tanduk.

“Lah lame kabah nunggu kawan, kami agak telat datang. Sebab lame saling betungguan ,” kate Taun agak madak.

Tambah Merin “Ukan disengaje Bapang Yung kami telambat, karene kami saling betungguan. Kami dide nyangke kabah lah datang di sini, jadi kami sesenai saje bejalan”.

“Biase ce, jangan nian purik. Jadi lukmane kite langsung berangkat ni. Sebab lah agak siang ini, kalu ndik madak kite sampai kele telat nian di badah jeme kagukan itu,” kate Ujang Kericup cak PD.

Pak Beluk masih mendam, kenan dide selire ngicik. Dalam atinye lah purik nian, mane die ye nyiapkan mobil, beli minyak. Lah bejanji tepat waktu, malah die ngerase dipusikah kekantin. Padahal ukan sanak die yang bekagukan ye kah didatangi, sanak kekantinnye ini. 

Nginak Pak Beluk masih mendam Ujang Tanduk ngicik “ Jadi lukmane kite ni Bapang Yung, berangkat ape lukmane”.

Ngerase tetantang kicik Ujang Tanduk Pak Beluk sambil betegak ngicik dengan tegas “Aku dide jadi berangkat, sebab sanak aku ukan yang kagukan itu, sanak kekamu nilah. Aku pusing pehaman bangai model kekamu ni, aku dide makainye. Kini aku kah balik, lajulah saje kamu kah ke kagukan itu”.