LUM LAME ni waktu di sekul Yung Pantit anak sematawayang Pak Beluk ngulang kemarah agi dengan guru kelasnye.

Kenan ni kene marah guru karne asak galak njawab soal waktu pelajaran sekul.

Waktu itu, guru sebelum balik sekul guru ngejuk pertanyaan.

"Nah, sebelum balik ni anak-anak cube sebutkan kudai name buah-buahan yang berawalan dengan hurup N minimal 5 jenis. Sape ye cepat bulih langsung ndulu balik," kate guru.

Karne ndengar pacak ndulu balik, Yung Pantit langsung nunjuj tangan dan pede nian pegi kedepan.

"Nah, cube sebutkan buah ape saje ye awalannye hurup N," uji guru dengan Yung.

"Yak mudah nian itu buk, nangka, nanas, nempedak, nejeruk, neapel," jawab Yung pede nian.

"Cube ulangi kudai agi Yung, buah ape-ape tadi," guru masih penasaran ngan jawaban Yung Pantit.

"Nangka, nanas, nempedak, nejeruk, neapel," Yung ngulangi jawaban die.

"Sejak kebile pule name cempedak, apel dan jeruk tu berubah tu Yung," guru betanye ngan Yung.

"Perasaan aku memang luk itu buk," Yung masih luk padek nian.

"Udimlah Yung, kaba mendian sekali balik. Amun ini baru cak calak nian, cak macak kaba ni," guru rengam.