PAK BELUK dengan kekantinnye sedang ngupi di berande ghumah Ujang Kericup. Raban tun gemimul ngicik, anye dide berani keras nian. Sebab mungkin ape ye dikicikan raban ini prinsip, takut begah dianging jeme lain nampaknye.

“Ce, memang kalau nurut agame kite ini sah nian bebini empat,” kate Merin agak semangat.

Nimbal Taun “Yak kalau itu keruan gale kite ini. Anye siape ye berani, itu masalahnye. Sebab jangankah sampai empat, mpai dikeruani ade nomor telpon aneh lah perang model Iran dengan Amerika Israil tu ce”.

“Atau model ini saje Merin, cukah kabah kudai. Kalau kabah lah tebukti ampuh nyampaikan mengenai makna ayat Al-Qur’an tentang bini itu, mangke kami ncukah pule,” sebut Ujang Kericup.

“Aiii kabah, itu njebak namenye. Pasti bakal banyak mode terbang di ghumah aku. Sejujurnye aku dide sanggup ce, urusan ayat itu nengkelah,” sebut Merin ngicik senai.

Sintung Taun agi “Kabah Pak Beluk lukmane, tinggal mendam nian. Biasenye kabah semangat nian urusan ini”.

“Ooo, ape ye disampaikan Al –Qur’an itu dide salah. Kite dijatahi bulih ngambik bini sampai empat. Anye aku ngimbik jatah sikuk saje, ndung Yung tulah ce. Kan bulih, kalau jatah itu kah diambik gale atau dide. Kele ukan  nambah jatah malah pikat ye luput, ukan nambah jatah jadinye, nukar babon saje. Jadi kalau kamu galak, aku ikhlaskan jatah aku diambik saje dengan kekamu banyak ni,” jawab Pak Beluk santai. *