Buyan Banyak Ulah

Petang kemaghi Pak Beluk di ajung Ndung Yung ngirimkah tanci ke rekeningnye.Jadi tanpa pikir panjang Pak Beluk langsung berangkat konter badah ngirim duit tu.

Singkat cerite, pas sampai situ Pak Beluk langsung ngicik ngan penjage konter base kenan ndak ngirim duit ke rekening bininye.

"Tape mang," tanye penjage konter.

"Aku ndak ngirim duit ke rekening bini aku," jawab Pak Beluk.

"Ui, mane nomor rekening dan berape ye ndak dikirimkah tu, pacak aku kirimkah," kate penjage konter tu agi.

Ndengar penjage konter mintak nomor rekening, Pak Beluk langsung bepikir.

"Amun aku nginak jeme di facebook tu, jangan asak saje ngejuk rekening ngan jeme ye dide kenal, kalu diambik jeme tanci kite di rekening kele," pikir Pak Beluk dalam ati.

"Ini nomor rekening ni dek," kate Pak Beluk sambil ngejukkah nomor rekening ye salah.

"Nah, udim mang," uji penjage konter agi.

Pas lah sampai rumah, Pak Beluk langsung semangat becerite ngan Ndung Yung.

"Lah kene tipu nian jeme penjage konter tadi. Kenan nampaknye ndak nipukah aku, tapi die ye lah kene tipu," Pak Beluk becerite.

"Ngape pule," Ndung Yung bingung.

"Tadi pas aku ndak transfer tanci, die mintak nomor rekening kamu Ndung Yung, yak langsung ku enjuk nomor rekening ye salah. Sangke die aku pacak ditipu," Pak Beluk pede nian becerite.

"Ai buyan ai, inilah namenye awak buyan banyak ulah. Lah lengit duit tadi, tekirim ngan jeme duit tadi, bukan ke rekening aku. Nyangkap nian idapan kamu ni Bapang Yung ," Ndung Yung rengam.