Besak Uap

Petang kemaghi Pak Beluk nemui Merin. Due sekawan ini ndak pegi ngecek kebun Pak Beluk ye ade di ulu dusun.

Kebetulan abis lebaran ni Pak Beluk lah kehabisan tanci, jadi kenan langsung ndak bejual kebun.

Amun ngicik sebelumnye kebun Pak Beluk ni libagh. Jadi kenan lah masang harge tinggi.

Sambil bejalan ke lokasi, Pak Beluk maju ngicik ngan Merin base kebun ye ndak di jualkan tu lebar nian.

"Kudai, berape libagh pule kebun kaba yang ndak di jual tu Bapang Yung?  tanye Merin.

"Yak libagh nian ce," timbal Pak Beluk.

"Tape isinye kebun tu," tanye Merin agi.

"Die tu ade empat mecan amun ndik salah, kebun karet satu hektare, kebun sawit satu hektare, kebun kopi satu hektare, kebun coklat satu hektare," jawab Pak Beluk pede nian.

"Nah libagh nian itu Bapang Yung, empat hektare bearti," uji Merin.

"Awu ce, tenang saje amun laku kele ndik kaba 10 juta per bidang," cetus Pak Beluk.

Singkat cerite, pas sampai di lokasi Merin marah besak nian. Tape, rupenye kebun ye kate Pak Beluk empat mecam tu cuman di lokasi yang same. Segale lahan tu paling sehektare segalenye.

"Wai lah dide nian sihat agi base kaba ni Bapang Yung, buyan bengak kaba ni. Mancean jeme 4 hektare nian kebun kaba ni, engkasnye cuman se hektare, anye segalenye ditanam di situ," Merin bejijih.

"Awu lah nyelah ini, 4 bidang lah ini," Pak Beluk masih luk adak tulah.

"Ai ndik nian ngubah kaba ni, besak uap tulah. Anye utak masih di bai keting tulah anye. Ude melah balik, dide kah numbuk amun luk ini jalan ceritenye," kate Merin rengam langsung ngajak balik.