Salah Kicikan

MALAM kemaghi abis makan, Pak Beluk ngobrol ngan bininye di berende rumahnye. Ndung Yung betanye ngan Pak Beluk.

Sebab, semenjak nikah Pak Beluk dide peratian nian agi dengan Ndung Yung.

"Bapang Yung, perasean aku pas kite masih nyanting dulu, kamu galak nian ngejuki aku hadiah. Anye ngape pas kite lah nikah ni dide perna agi kamu ndak ngejuk hadiah ngan aku," tanye Ndung Yung.

"Kalu perasean kamu saje titu. Awak rajin aku enjuki kamu hadiah," timbal Pak Beluk sambil ngisap rukok.

"Kate kamu saje titu. Setahu aku dide perna agi kamu ngejuki hadiah ataupun kejutan ngan aku. Kamu ni mbak ini dide nian ade agi perhatian ngan bini," kate Ndung Yung agi.

"Ui Yang. Cube kamu kinak nelayan tu, ade dide nelayan yebngejuki ikan umpan, anye ikannye tu lah udim ditangkap," kate Pak Beluk sambil manggil sayang dengan bininye takut tersinggung. Sebab kenan hanye beragam saje.

"Awu kendak kamulah," timbal Ndung Yung sambil masuk kedalam ninggalkan Pak Beluk.

Pas malamnye, waktu Pak Beluk ndak tiduk. Duare kamar lah tekunci njak dalam.

Lah takut nian Pak Beluk sebab, bini pasti marah gawih kicikkan die tadi.

"Ui Ndung Yung, ngape duare ni dikuncikah ni. Aku ni ndak tiduk," kate Pak Beluk degur-degur nutusi duare kamar.

"Ngape Bapang Yung. Cube kamu kinak kudai nelayan tu, ade dide ye tiduk dengan ikan," timbal Ndung Yung njak dalam kamar.

"Yak aku tadi cuman beragam saje uii," timbal Pak Beluk agi.

"Udelah, tiduklah ngan ikan tulah kamu," timbal Ndung Yung agi.

"Ai rusak nian ini. Lukak kedinginan malam ni awak aghi ujan mangke tiduk surang depan tv gawih ni. Gegara salah kicik ngan nelayan gale ini," pikir Pak Beluk.