Kredit Ndik Lunas

PETANG kemaghi Pak Beluk ngundang kancenye Merin datang ke rumahnye.

Pak Beluk ni ade nian yang ndak diceritekan dengan kancenye tu.

Singkat cerite, saat Merin lah sampai, Pak Beluk langsung becerite keluh kesahnye soal kredit ye ndik lunas-lunas.

"Luk ape menurut kaba ce. Aku ni punye kredit, ye lah bertahun-tahun, anye dide lunas-lunas," kate Pak Beluk.

"Nah luk ape pule titu Bapang Yung," Merin bingung.

"Itulah, setahu aku amun jeme kredit rumah saje 10 tahun lah lunas," kate Pak Beluk agi.

"Yak awu bai. Kalu ade nunggak bayar kamu tu sangkan dide lunas-lunas tu," tanye Merin.

"Mane pule, maju bayar aku ni tiap bulan. Anye dide kina lunas-lunas," kate Pak Beluk agi.

"Mangke kredit tape die pule kaba tu Bapang Yung," Merin penasaran.

"Kredit listrik. Kan maju dibayar tiap bulan. Anye dide pernah lunas-lunas barang tu," kate Pak Beluk.

"Yak wajar pule amun itu. Tapi ngenian pule awah. Maju dibayar tiap bulan anye dide kilah lunas setembak itu," jawab Merin.

"Kaye nian jeme ye punye listrik amun luk itu ce," keluh Pak Beluk.

"Itulah Bapang Yung. Kite ni ye tambah sare saje. Peci kredit ndik lunas-lunas ni," uji Merin ye penasaran pule ngape kredit listrik ndik lunas-lunas.