Promo Akhir Tahun

Belum lame ni Ndung Yung ngan Pak Beluk jalan-jalan. Kalu katenye liburan akhir tahun puk lum tahun baru.

Lah sampai di kota Ndung Yung anjam nian, rupukannye ndak bawe Pak Beluk ke mall.

Lah sehari di kota Ndung Yung diam saje, karne Pak Beluk lum ade tekicik ndak jalan-jalan. 

Lah kedue harinye di kota Ndung Yung pai banyak kicik karne lah diajak ke mall uji tu.

Singkat cerite lah sampai di mall nginak tulisan banyak ye promo. Ndung Yung lah cuil Pak Beluk saje.

"Yak Bapang Yung, kah banyak promo tu, nyelah kate jeme promo akhir tahun tu titu," kicik Ndung Yung merayu Pak Beluk.

"Awu jelah titu, kalu dak beli milih yang kebutuhan ghumah saje," jawab Pak Beluk.

"Yakk tape gati jalan-jalan kalu nide beli baju, jeme dak tahun baru," timbal Ndung Yung.

"Kalu tahun baru lemaklah kite ke sawah, nide pule ndak jalan-jalan, mase nide bepuas," Pak Beluk jawab agi.

Singkat cerite agi, ntah rayuan ape singgenye, Pak Beluk tebuai.

"Demm kalu uluk itu gilah, belilah baju anye jangan baju gale kebutuhan rumah juge, anye jangan nide tetapi janji tadi," Pak Beluk ngicik agi, sambil senyum-senyum karne ade janji Ndung Yung.

"Awu, tenang saje  berarti bulih ngambik baju ngan kebutuhan ghumah, nah kalu luk inikan lemak," Ndung Yung sambil senyum-senyum tipis.