Bemuni Dipakai

BELUM lame ni Pak Beluk rengam nian karne mobilnye ye empai dibeli sebulan lalu maju ngeluarkah bunyi aneh.

Karne Pak Beluk lum keruan nian persoalan mobil ni, kenan langsung berayak dengan kance lamenye Merin.

Kebetulan, Merin ni memang lah lame pakai mobil dan lah paham soal mobil.

Singkat cerite, pas lah sampai rumah Merin, Pak Beluk langsung nyampaikan keluh kesahnye.

"Ce, ngape setum aku ni maju bemuni ni," tanye Pak Beluk.

"Bemuni luk ape Bapang Yung, mangke tu amun dide bemuni dide idup bearti," timbal Merin.

"Entah perasaan aku setum ni maju ngeluarkah muni aneh," kate Pak Beluk agi.

"Itulah kaba tu Bapang Yung, ye namenye barang dipakai pasti ade saje pemunian nye," timbal Merin agi.

"Masih nian ce, aneh nian perasaan aku muni mobil ni," Pak Beluk masih lum percaye.

"Hui Bapang Yung, bukan mobil saje bemuni amun maju di pakai, lagi jeme ghumah idar pemunian die karne maju di pakai," uji Merin.

"Lain nian ce," kate Pak Beluk agi.

"Lain die, tapi aku tu sebagai umpama saje. Kaba pikirkah saje, amun lum kaba pakai dulu jeme rumah kaba tu adak ndik bepemunian. Melami saje gi dide, jangankah ye lain. Luk itu pule mobil kaba tu, amun dide kaba pakai dide kah banyak pemunian die," kate Merin sambil tetawe kecik.