Besak Uap

Petang kemaghi Pak Beluk, Ujang Kericup dan Merin duduk santai di rumah Merin. Tige sekawan ni becerite soal rumah tangga masing-masing.

Die betige ni same-same luk padek nian dan ngaku njadi raje gale amun sedang di rumah. Ape agi Pak Beluk, die paling anti nian nampaknye dikicikka takut ngan bini.

"Yaj amun aku, kite ni palak nye di rumah tu, jadi harus tegas," kate Ujang Kericup luk padek nian.

"Tambah aku yang jelas nian, amun aku ngicik dide pasti dide tulah. Ape agi ngan jeme rumah," sintung Merin.

Pak Beluk ye nggub kalah gertak, langsung betegak dan sambil nepuk dade udim tu ngicik "Ai lum seberape kamu tu, amun aku di rumah tu segalenye tegantung dengan aku. Amun lum ade perintah aku lum bedie ye berani memacam,".

Ndengar Pak Beluk ngicik luk itu, Merin ngan Ujang langsung tecengang dan kagum dengan Pak Beluk.

Anye ndik lame tu, HP Pak Beluk bemuni dan nampak di layar betulisan (Bidadari Tak Bersayap).

Setu nginak telpon tu, muke Pak Beluk langsung pucat, sambil ngengecikan Pak Beluk langsung ngangkat telpon tu.

"Ui buk, awu siap buk, langsung baliklah ini buk," kate Pak Beluk ye langsung bepingkas ndak balik.

"Nah, uji tadi kaba ni raje di rumah Bapang Yung, anye ngape empai kenai telpon sekali langsung gemetagh, tepucat ijang dan langsung ndak balik ni," kate Merin.

"Itulah base kamu ndik keruan, ye namenye raje pasti takut ngan ratu," jawab Pak Beluk sambil langsung ngingkul mutur ndak balik.

"Ah, besak uap saje kaba ni Bapang Yung, amun tadi luk padek nian, giliran kene telpon tinggal luk bekatak diempaskah, hahahaha," Merin dengan Ujang langsung ngakak tetawe nginak Pak Beluk.*