Ampir Gile

KEMAGHI, pas balik njak sekul Yung Pantit anak Pak Beluk langsung belajar bahasa Inggris ngan ndungnye.

Anye, kenan nanggung kene marah ngan Ndung Yung. Sebab, ulah Yung ni ampir mbuat Ndung Yung gile.

"Mak, bahasa Inggris what itu artinye ape?," tanye Yung.

"Awu nyelah ape tulah Yung," jawab Ndung Yung.

"Nyelah tape mak. Aku kan betanye what tu tape die retinye," uji Yung agi.

"Ui awulah, artinye tu nyelah ape," timbal Ndung Yung.

"Iyak entah nian pule bai, jeme betanye kamu ikut betanye pule mak. Luk ape ndak terti aku ni," Yung merengam.

"Woi Yung! aku ni dide betanye ngan kaba. Aku tu njawab basekan what tu artinye ape alias apa," Ndung Yung mulai rengam.

"Nah mangke tape dide artinye tu mak," Yung tambah bingung.

"Lak illah Yung Pantit. Baseka arti what dalam bahasa Indonesia adalah apa amun base kite nyelah ape. Luk mane kaba ni," Ndung Yung njelaskan sambil marah.

"Nah kan masih kina betanye tulah kamu tu mak," timbal Yung luk adak.

"Ayai Yung ai, same nian ngan perembak bapang kamu kaba ni. Belajagh lah saje ngan bapang kabah Yung. Bene aku. Ngape aku ase kah gile gawih kaba ni," Ndung Yung tambah marah.

"Ui awu luk itu mak, udim amun luk itu dide ndak marah nian bai," timbal Yung pede nian.

"Ai entah Yung kendak kabalah," kate Ndung Yung sambil kisit.