Batasan Hati

PAK Beluk sedang beubat di gumah dukun dusunye, tetibe HP kenan bebunyi. Tapi karene kenan agi diubati dukun, jadi dide dipusikah HP itu.

Kenan dide peduli, sebab dalam ati kenan urusan HP kele kudai. Sebab irusan kesihatan itu lebih penting dari gegalenye.

Anye waktu kenan bukak, agak tekejut dengan WA njak Taun. Sebab isinye agak tekejut, langsung kenan balas.

Belum lame kenan dibalas Merin agi, isinye mbuat Pak Beluk purik. Akhirnye Pak Beluk telpon nian Merin.

“Aku agi beubat ce, jadi kele pule kite ngurusi kerje tu,” kate Pak Beluk ngicik di HP.

Timbal Merin njak HP “Oii kabah, aku ini serius, galak kabah kerje tu dide”.

Sahut Pak Beluk “Galak nian, sebab aku ndalak lukak nian mbak ini. Anye kele saje kite betemu, sebab aku kini sedang beubat”.

“Inilah kabah, dinjuak lukak banyak nian alas an, banyak jeme galak kerje tu, ukan kabah sughang. Jadi kalau galak datang kinilah, kalau dide aku njukah dengan jeme lain,” sahut Merin pedas.

Nganing kicik kantinnye Pak Beluk masih agak ngelembut, kenan ngicik “Sabar kudai ce, aku ni serius agi badah beubat.

Aku galak nian kerje tu, tolong jangan dinjukah dengan jeme lain kudai. Tolong nian ce, kabah tu kantin kebanggaan aku”.

“Inilah kabah, urusan kantin itu ukan urusan kerje. Jadi jangan disangkut pautkah dengan kerje kite. Kabah galak nian kerje ape dide, kalau galak nurut perintah aku ini,” tegas Merin pasang udim.

“Aiii kabah, luk ini saje ce, kalau mbak itu njukah dengan jeme lain. Jangan mentang – mentang aku ni butuh kabah tekan – tekan nian. Kite ini harus saling memahami, mentang – mentang kabah ade lukak asal saje ngicik. Aku ade batasan hati, kesehatan aku lebih penting njak kerje itu. Kini njukah dengan jeme lain,” Pak Beluk lah ngagat sambil nutup HP.