Dide Pacak Besimbun

Pak Beluk sedang makan dighumah makan dengan raban Merin dan Ujang Kricup, di lokasi ghumah makan banyak jeme beli.  Waktu sedang makan, busung  Pak Beluk ini kembung, tetibe endak buang angin (kentut). Karena dide pacak di tahan, Pak Beluk ndalak akal supaya kentutnye ini dide bebunyi karena posisi jeme ghami.

"Bismillahirrahmanirrahim, kekalulah dide berbunyi uii, malu kemati kalu sampai berbunyi," kate Pak Beluk dalam hati.

Pade waktu sedang beusahe nahan kentut ini tadi supaye dide bebunyi, Merin minta tolong ngambik gelas yang dide jauh di badah duduk Pak Beluk. Cuma kalu dalam posisi duduk gelas itu dide pacak diambik, harus betegak nian. Pak Beluk ini dide beghani ngicik dengan tegak. Karena kalu balas kalimat Merin ini tadi ceki bebunyi kentut, semegi pule dengan betegak. 

"Ce minta tolong ambik kudai gelas damping kamu itu, aku ni mengkelan, tolong nian," kate Merin.

"Eeeeeeeee," kate Pak Beluk icak-icak dide nganing.

"Tolong ambik kudai ce, tolong nian," kate Merin.

"Uiii Pak Beluk ambik kudai gelas itu, inak kudai Merin itu mengkelan," kate Ujang Kricup di ujung kursi Merin.

Waktu tegak, pas endak melangkahkan keting endak ngambik gelas akhirnya Kentut yang ditehan Pak Beluk tadi bebunyi.

"Preeeet," bunyi kentut Pak Beluk.

Jeme di dalam ghumah makan ini tadi, seketike langsung ngarahkan muke ke Pak Beluk. Sedangkan Pak Merin yang ngehaning kentut Pak Beluk langsung kelepas tetawe, seketike langsung dide agi mengkelan. 

Pak Beluk ngabang mukenye, dalam hati kenan “Oii malu banding mati ini. Dide pacak besimbun agi tubuh, malu tegalau”.*