Mulai Mengkuau

MALAM kemaghi Yung Pantit anak sematawayang Pak Beluk tekejut bukan main nginak Ndung Yung mendam sughang di dapur rumah.

Kebetulan, waktu itu Ndung Yung ni beselebu pakai baju ujan plastik bewarna abang.

Karne penasaran, Yung Pantit langsung betanye dengan ndungnye tu.

"Yak mak, ngengape kamu ni. Tengah malam bute makai baju ujan di dalam rumah ni," tanye Yung penasaran.

"Hui Yung jangan masigh ngan aku. Jejajuh lah kaba tu," timbal Ndung Yung.

"Yak kudai ngape kamu ni mak, jangan nakuti aku," Yung tambah penasaran.

"Ude pegilah guk bapang kaba saje. Jangan masigh guk aku ni," timbal Ndung Yung agi.

Nginak ndungnye luk itu, udim tu ngusir die pule, Yung langsung pegi njenguk Pak Beluk sambil nangis.

"Nah ngape ini Yung, tape makan kaba dedebagh nangis ni," kate Pak Beluk.

"Kinak kudai ndung tu bak, ngape die lah luk jeme gile tu," kate Yung sambil maju nangis.

"Gile luk ape Yung, bebenar kudai," Pak Beluk penasaran.

Singkat cerite, pas nginak bininye lah bebungkus baju ujan tu, Pak Beluk tekejut bukan main.

"Ui Ndung Yung, bejage kudai. Masih sihat kamu ni. Maro ngucap," Pak Beluk lah cemas nginak perembak bininye.

"Itulah, jangan masigh ngan aku. Kalu kamu kene pule kele," timbal Ndung Yung.