Jebakan Kate

PAK Beluk belum lame ini purik nian dengan kekantinnye, sebab raban tu ngingkari janji. Padahal waktu bejanji cak pakam gale, padahal raban kekantin Pak Beluk ini  lah jeme hebat gale, ade yang sarjana kapuh.  Pak Beluk dewek yang masih S3 alias SD, SMP dan SMA. Akibat raban kekantin galak nyalahi janji, mbuat Pak Beluk ukan agi naikkk tensi darah, tepantak ke gule darah naik pasang udim.

“Oiii ngengape kamu di group ni dide njage kometmen kesepakatan kite, mare mikir kudai. Kite ini lah same tue, mase kite ye nyapoaki, kite dide ngerjekah,” tulis Pak Beluk di group WA.

Lah lame Pak Beluk nunggu balasan, anye balasan dide bedie tekinak. Ini nambah kenan pusing agi , kenan tulis agi “Ade dide jem di group ini?”

Belum lame mbalas Ujang Kericup “Pasti adelah jeme di group ini. Kabah tu jeme juge bapang Yung”.

Nginak tulisan itu Pak Beluk ngangat, sebab ade badah melampiaskah puriknye “Au keruan aku jeme, oleh sebab itulah aku betanye. Aku pikir aku dewek jem, kirenye ade kantin aku, kabah. Buktinye mbalas WA, kalau beghuk dide nian balas. Sebab beghuk tu dide ade HP dan dide pacak nulis”.

Taun yang nginaki tulisan Pak Beluk agak panas, kenan langsung balas “Ape maksud kabah bapang Yung? Kabah pikir kami ini ukan jeme, jangan asal tulis. Kami ini jeme, ukan beghuk”.

“Na Ujang Kericup, ade selain kite bedue jeme. Buktinye balas wa, mungkin cume inilah jemenye. Ye lain tu memang beghuk, sebab dide mbalas,” tulis Pak Beluk.

Nginak tulisan tu, raban tu mbalas gale di dalam group WA sebab dide galak kicikan beghuk. Anye Pak Beluk nulis agi “Berarti jem gale dalam group ini, sebab balas gale dikicikan beghuk. Anye jadi pertanyaan, ngape dide nepati janji diputuskan besame, aku pikir ini utak beghuk. Ye penting memanggut, sepakat, urusan njalankan keputusan dide dimasukah dalam utak. Kekire kalau jeme paham, kalau beghuk dide”.

Mendam gale jeme dalam group WA tu, terip ini kene nian jebakan kate beghuk Pak Beluk.