Penggawian Kecul

BELUM lame ni Pak Beluk dengan Ndung Yung kah betandang ke badah jeme pesta agak jauh juge dengan dusun, kotalah. Pasang udim nian, Ndung Yung bedandan. Pakai sanggul ye besak cak model putri 80an nian.

Semingge jeme laki bini ni nempecung pakai motor. Anye dide keruan alamat kah dituju, tepakse pakai google maps. Anyhe Ndung Yung  nide tahu bace google maps, jadi bute jalan. Laju Pak Beluk yang nginak google maps.

Berhubung Pak Beluk tukang kinak google maps, Ndung Yung yang makai baju gamis ni tadi makai motor, jadi tukar posisi.

"Bebenagh nginak google maps tu, nyesat kite nide sesampai," kicik Ndung Yung dengan Pak Beluk.

"Ndiamlah, fokuslah dengan jalan tu, kinak jalan besak ni kalu tegelimpang," jawab Pak Beluk.

Lah ditengah perjalanan Pak Beluk agak bingung karne nide nyampai-nyampai.

"Ngape kite ni ndik sesampai ni Ndung Yung, nide nengkare tesesat kite ni lah jam 10, lah jak tadi begelusah dijalan besak ni," Pak Beluk agak panik.

Singkat cerite kenan lah bene karne nide nyampai-nyampai. Lah puasan begelusah, Ndung Yung lah memengut saje karne sama-same bute google maps.

"Gaya kabah saje cacak terti nginak google maps ni tadi bapang Yung. Kalu kah luk ini gawi, nengkalah kabah shuhang pegi, jadi kabah ni cacak pacak alis cakmacak, penggawian kecul gale," Ndung Yung sambil ngiluki sanggul model RA Kartini sambil kesal.