Beli Asli

PAK BELUK belum lame ini calon jeme penting di dusunnye, anye kenan agak ragu. Sebab surat tamat sekolnye itu ukan model jeme rimbaknye. Kenan ini dide sekol formal, tapi karene calak kenan pacak dapat surat tamat sekol. Karene jeme banyak iri dengan Pak Beluk, mangke kenan dilaporkah ke Polisi. Kenan dilaporkah makai ijazah palsu, semingge ringkas cerite dipanggil Polisi Pak Beluk.

Polisi mulai nanyei Pak Beluk “Mang Ijazah kamu ini didapat dari mana? Sekolah dimana dan siapa gurunye?

Dalam ati Pak Beluk “Neman pule Polisi ini bejijih, aku akali saje lema dide lame. Ajak damai care dusun saje”.

Sambil mandang Pak Beluk, Polisi nyampaikan “Aku bertanya ini mau dijawab mang”.

“Oooo mbak itu, tande tamat aku ini didapat njak sekul nian. Anye ukan sekola akap, aku ngambik sekol malam. Supaye belajar senai dengan gurunye”, terang Pak Beluk cak adak saje.

Agak tekejut Polisi, sebab dide bedie sekolah malam. Tapi Polisi bijaksana, Pak Beluk ditanye dengan lembut “Mang waktu sekol paket itu dulu berape lame tahun kamu dapat ijazah?”

Spontan Pak Beluk njawab “Aku dapat langsung, begitu daftar langsung dapat ijazah, dide pakai ulangan dan ujian”.

“”Oooo, tapi kok bisa ya mang, apakah mamang tidak curiga bakal dibohongi,” tanye Polisi menyelidik.

“Dide bai, lah aku sampaikan bahwe aku beli ijazah yang asli dengan guru tu. Supaye kele dide ade masalah,” terang Pak Beluk dide sadar.

“Ooo jadi beli yang asli mang ya? Bagus itu mang,” kate Polisi senai tapi dalam.

Pak Beluk mpai sadar,  kenan lansung ngicik “Udimlah Pak. Janganlah dimasalahkah agi ijazah aku tu. Aku batal calon di dusun, asal jangan tejiel kite silap saje ijazah aku ini”. *