Gempau

Lah berape malam ni Ndung Yung bini Pak Beluk maju ndik tekelap tiduk. Ndung Yung ni takut kalu gempau besak ngulang agi.

Saking takutnye, asak lah ade muni gemeritik dikit di atas ruma, Ndung Yung lah langsung masang kuda-kuda ndak belaghi ke luar rumah.

"Ai memintaklah nidau adau agi gempau besak," kate Ndung Yung ngicik dengan Pak Beluk.

"Yak ke ngape kamu ni Ndung Yung. Amun bencana ndak datang dide ke pacak ngilakka die," timbal Pak Beluk.

"Yak dide nian bai, amun tetibe ade gempau agi, dan aku kene tinggang dinding rumah ni. Udim tu laju mati aku, lik ape," Ndung Yung mulai idar ngicik.

"Hui Ndung Yung, amen namenye balak, judu, rezeki ngan maut tu dide pacak kite ngilakkah die. Amun lah sampai ajal masih kah mati tulah kite ni," uji Pak Beluk ngiciki bininye.

"Ngape kamu luk senang nian amun ngicikkah aku mati," Ndung Yung mulai ngangat.

"Hui tape hubungan die ngan cerite kamu tadi. Ngape lah mulau mengkuau ni," Pak Beluk rengam pule ngan tingkah bininye.

"Odolah, amun aku mati ndulu pasti kamu kah bebini agi. Lah keruan nian ngan aku pejekau kamu tu," Ndung Yung tambah panjang linagh.

"Ai lah parah nian kamu ni. Ude nengkelah aku saje ye tinggabg dinding dan udim tu nengkelah aku pule ye mati. Ngudim die," kate Pak Beluk sambil narik selimut ngulang tiduk agi.