Lupe Ingatan

LAH ndak berape tahun ini Pak Beluk ngah Ndung Yung ni ribut masalah brewok, kumis ngah jenggot Pak Beluk yang ndik dicukur-cukur.

“Udimlah kudai kabah ni bejijih manjang ni Ndung Yung, aku luk ini mirip ustaz-ustaz tu,” kate Pak Beluk.

“Amu jeme tu ustaz nian die, kabah ni luk beruk muke luk itu penuh bulu gale,” jawab Ndung Yung.

“Kabah tulah ye kegelian nginak muke ku luk ini, jeme ye lain-lain senang gale nginak brewok ni,” sahut Pak Beluk.

“Au serahlah kabah, ndik nian pacak kabah nuruti akuni,” Ndung Yung kesal.

Karene pusing pule ndengarkah Ndung Yung ni bejijih manjang, Pak Beluk ni berencane ndak nyukur brewok, kumis ngah jenggot die.

“Ay aku prank saje kudai, makenye jadi kejutan untuk Ndung Yung, bucin dikit ndik kah ngaruh puk umur lah tue ni aseku dak,” Pak Beluk bejijih sughang sambil senyum-senyum.

Singkat cerite Pak Beluk ni lah balik ndai nyukur habiskah brewok, kumis ngah jenggot die. Singgenye Pak Beluk ngerencane ndak ngeprank bini ngah anaknye.

“Aku prank saje kudai, masih cinung dakgi Ndung Yung ngah Yung Pantit ni kalu muke ku lah bersih gale ni au,” kate Pak Beluk maju bejijih sughang.

Sampai lah Pak Beluk ni di ghumahnye. Die langsung ngeprank anaknye.

“Hallo nak, boleh nanye ghumah bapang Yung ni dimane nak?” Pak Beluk mulai ngeprank Yung Pantit anaknye.

Ndengar disapa Pak Beluk, Yung Pantit lari ke dalam ghumah sambil ketakutan.

“Mak….. akuni takutan,” kate Yung Pantit.

“Tape die?” tanye Ndung Yung.