Nyanting Jande

BELUM lame ini Pak Beluk kalau keluar ghumah pakaiannye peci udim rapinye, minyak harumnye luar biase pule. Tambah sisiran rambutnye nicis pakai minyak kemiri pule. Ndung Yung Pantit lah agak curiga nginak tingka laku Bak Yung Pantit. Mase amen pegi ngalakah anak muda dan bukan model ye biase. Dalam ati Ndung Yung, ngape Pak Beluk ni amen pegi pakaian stil nihan, nyaingi penampilan anak mude. Bukan berande kenani.

BACA JUGA:RSUD Kaur Buka Poli Psikologi, Direktur: Manfaatkan Layanan Ini untuk Sayangi Mental

Tapi kalau salah tebak kele beduse pule, duse lame lah banyak. Galak mbudikan Pak Beluk, jak segi tancinye banyak digunekah dengan bayar kredit cicilan diam-diam. Tapi mungkin ini hukum karma pule, Pak Beluk kurang ngenjuak belanje. Raseku amen dengan jande masih cantik, tapi ngape Pak Beluk jarang balik. Pegi sampai dua hari dan tige hari mpai baliak. Pas balik ngape pakaiannye banyak kusutnye. Tambah siang aghi tiduk saje, malam mimbar pule, apelah kendaknyeni. Saking curigah nung Yung minta pendapat dengan Merin.

“Bantu kudai aku Merin, mu kan kance Pak Beluk jak dunie tebentang sampai Pemiluni. Dide kan beubah masih sekawan saje,”kata ndung Yung Pantit.

“Ape pule mu minta tulung, ngape de dengan Pak Beluk raje nipu itu,” jawab Merin.

“Mu juge lah ngicik raje nipu, aku juge de pecaye dengan die galak keluar malam,” timbal Ndung Yung agi.

“Biase kini tue-tue keladi, makin tue makin jadi iluak anak mude,” jawab Merin agi.

“Ngape mu bepantun iluak itu Merin,” Timbal Ndung curigah.

“Biase,… rumput di luar lebih hijau dari pade rumput di rumah,” ucap Merin agi.

“Ai ape pule rumput itu Merin, amen rumput dikit ade dengan aku de pule ndak mimbar malam,” Ndung Yung kesal.

“Malam kelo pacak aku intip kudai kerjo lakimu tu sape tahu ade kance baru,” jawab Merin agi.

Pas malam tu mulai Merin ngintip Pak Beluk lagi bejande. Diam-diam Merin ngintip belakang dinding rumah jande, singkenye dengar gale ucehan Pak Beluk dengan jande mude.

“Biase kalu masalah tanci, akuni lah lame jadi jeme kaye,” kata Pak Beluk dengan jande

“Tolong belikan aku kalng emas mangke tambah cantik akuni,” timbale jande.