Antu Gosip

MAK Beluk kini dang ngobrol nga kekawannye di damping gerobak tukang sayur. Lah jadi kebiasaan, rombongan kerbai tu pasti nge-gosib. 

Beragam topik dighibahkan rombongan tu. Mulai njak gosip selebritis sampai gosip tentang sesame kerbai di dusun itulah. 

"Oi lukmane ceritenye artis ibukota benama Vesta tu. Uji katenye lah pindah njak pindah server nga Mukmen Zardi ye lah duluan pindah server," tanye Ibung Ijah nga kekawannye. 

"Itulah jiku. Amu lasung die pindah server. Alangkah bangat lanang tu. Udem saghak mangke kini lah genti Tuhan pule," kate Mai Camai menimpali. 

"Masih gosip saje titu. Lum A1 informasinye," kate Mak Beluk. 

"Ooohhh," jawab rombongan kance Mak Beluk. 

"Mangke lukmane kabar Kepale SD di kecamatan sebelah tu. Uji katenye terlibat VCS nga bini jeme," tanye kawan Mak Beluk ye bename Mbak Surti. 

"Aii itulah katenye. Dang Heboh kini tu di kabupaten kite ni gegara kabar itu. Guk nian ape dide kabar itu, Endung Yung," kate Wak Bordir menimpali dan betanye. 

"Amu keterangan sementara njak di oknum kepala sekolah itu. Betul ye dalam video tu kenan. Katenye die dijebak nga lawan vcs-nye tu. Anye entah lukmane ye sebenarnye. Cuma Tuhan nga rombongan bajang tu ye keruan," jelas Mak Beluk. 

"Yak Mak Beluk. Keruan gale kaba info tentang gosip ter-hot ni. Lah same luk wartawan kaba ni. Keruan gale info dunie," kate Mamang Sayur. 

"Yak Mang. Itulah gunenye ade Hp (Handphone, red) ye dibeleikah laki ni. Gunenye bukan cuma untuk eksis upload foto nga video di Sosmed. Bukan pule cuma untuk dedenggit joget di TikTok. Pacak untuk peranti cakagh informasi gune Hp layar payut ye pepak nak kouta ni," jelas Mak Beluk.