Buyan Ndik Betanduk

Petang kemaghi Ndung Yung bini Pak Beluk sibuk nian beres-beres di rumahnye.

Karne nginak anak semata wayang nye Yung Pantit nyatai saje main Hp. Jadi kenan ngajung Yung nulung pule.

Karne dianggap murah juge ngerjekanye, Ndung Yung ngajung anaknye nyirami bunge ye ade di depan rumahnye.

"Yung cube kaba sirami kudai bunge di depan rumah tu," kate Ndung Yung sambil nyapu rumah.

"Luk ape pule ndak nyirami bunge ni mak, lan ujan," timbal Yung.

"Woi alang ke bigal kaba ni, amun ujan tinggal pakai payung Yung, tape segenye," uji Ndung Yung agi.

"Ui mak luk ape kamu tu, amun ujan tape gati agi nyirami bunge," timbal Yung.

"Tape hubungannye dengan ujan amun ndak nyirami bunge nila," Ndung Yung lum kilah sadar.

"Ayai mak ai. Amun ujan lah jelas basah pule bunge di depan rumah tu. Jadi untuk ape agi pule nyirami nye," Yung berusaha njelaskah dengan Ndungnye.

"Ui awu nian pule awah," timbal Ndung Yung sambil nyengir-nyengir.

"Lah pikun kamu ni mak. Payu beobat kudai mak," kate Yung agi.

"Awu kalu nian lah pikun aku ni. Tape amun dide diijekan bapang kaba," jawab Ndung Yung nyalahkan lakinye Pak Beluk.

"Ai banyak ige bahasan kamu mak, ude nyapulah amun ke nyapu," kate Yung sambil nginaki Hp agi.*