Cecak Terti

Lum lame ni Pak Beluk belajar makai setum (mobil, red). Kenan belajar dengan kawannye Merin.

Singkat cerite pas lah sampai badah belajagh, Merin langsung ngajung Pak Beluk duduk di bangku sopir.

Anye, satu duduk di bangku sopir, Pak Beluk langsung luk terti nian. Kenan dide ndak dengari kicik Merin.

Pas mobil lah idup dan ndak bejalan, mobil tu langsung mati agi. Anye Pak Beluk masih luk padek nian tulah.

Karne lah rengam nginak tingkah Pak Beluk luk padek nian, Merin langsung marah dengan Pak Beluk.

"Ui Bapang Yung amun lum terti tu jangan luk padek nian. Awak lah aku kicikkah tadi guyur saje lepaskah koplingnye tu," kate Merin bejijih.

"Lah guyurlah aku lepaskahnye ni njak tadi. Anye masih mati tulah setum ni. Kalu lah rusak barang ini," Pak Beluk masih luk keruan gale tulah.

"Amun guyur lepaskahnye, dide kah mati setum tu. Keruan ndik mane kopling ye mane setum ni," Merin tambah rengam.

"Anu ce, sebetulnye aku dide keruan ye mane kopling setum ni," kate Pak Beluk sambil nyengir-nyengir.

"Ai bajang ai. Amun ndik keruan tu jangan cak macak, untung dide kampung jeme rami kite belajagh ni. Adaknye, kalu lah mantak jeme setum ni tadi. Ude melah balik, lum ke numbuk kaba ni belajagh ngan aku," Merin langsung ngajak balik karne lah rengam nian.

"Yak, mangke kebile aku pacak besetum amun luk itu ce," uji Pak Beluk.

"Mandak kudai besetum amun banyak gayah ige," kate Merin sambil ngambik alih setir mobil agi.*