Pejabat Besak

Petang kemaghi Pak Beluk berusik ke rumah kace lamenye Merin. Anye pas balik njak rumah Merin, Handphone (Hp) Pak Beluk tinggal.

Anye karne dide paham nian ijean Hp, merin maju nelpon ni Pak Beluk. Pikir kenan, pacak ngicika bahwe Hp Pak Beluk tinggal tu.

Anye karne dide diangkat, Merin terupuk ngirim SMS ke nomor Hp Pak Beluk.

"Dimane kaba ce," kate Merin dalam SMS tu. Anye dide kina dibalasnye dengan Pak Beluk. Kenan SMS agi.

"Yak, alah ke sibuk kaba ni pecaknye," Merin ngulang SMS, anye dide kila dibalas.

"Uii.. Bukan lah beidapan kaba ni Bapang Yung," kate Merin mulai marah-marah di SMS tu. Anye dide kilah di balas.

Lum lame Merin ngirimka SMS tu, Pak Beluk ngelipat melanjui Hp ye tinggal. Pas nginak Pak Beluk, Merin langsung marahi Pak Beluk.

"Ngape kaba ni Bapang Yung. Di telpon ndik diangkat, di SMS ndik dibalas. Luk pejabat besak nian kaba. Aku nelpon ngan SMS ni bukan ndak mintak sumbangan. Aku cuman ndak ngicika Hp kaba tinggal di rumah ni," kate Merin panjang libagh marahi Pak Beluk, sebab kenan lah naik darah nian.

"Luk ape aku ndak ngangkat telpon njak kaba, udim tu ndak mbalas SMS kaba, amun Hp aku tinggal di rumah kaba ni. Bigal ape luk ape kaba ni," timbal Pak Beluk balik marahi Merin.

"Ui awu adak nian pule awah," kate Merin empai sadar.

"Awu. Bigal dide nian betanduk. Sebab, pacak kecinean ngan jeme amun luk itu," uji Pak Beluk sambil pamit balik.