Guru Pantun

Pak Beluk ni gi suntuk, di ghumah juge dikbedie gawean. Busiklah ke ghumah Merin.

Sambil ngobrol ni tadi, Pak Beluk ngecik ngah Merin base ndak belajar pantun. Lemak gombali bibainye.

"Dimane penunjuk dengah Merin, yepacak ngajari aku pantun. Anye pantunnye tu bukan sembarang pantun," kate Pak Beluk.

"Ndak pantun luk mane? Kah ndik ape gati pantun umur lah tue ni Pak Beluk?" lanjut Merin.

“Uyy ndak tau benagh kabah urusan ku, kicik kalah di mane ye pacak ngajari aku pantun. Anye pantun bukan sembarang pantun,” uji Pak Beluk, serius benagh.

“Uyy au Pak Beluk, pantun bukan sembarang pantun tu luk mane titu? Tuape judulnye ndak luk mane?” jawab Merin ni tadi.

“Nanahh .... Masih kina nanye dengah. Kate ku pantun bukan sembarang pantun, titulah judulnye,” lanjut Pak beluk.

"Jangan ndak malukah aku dengah Pak Beluk, pai inilah aku dengar pantun bukan sembarang pantun," Merin agak emosi.

Datanglah Pak Beluk ngah Merin nitadi ke ghuma kance Merin.

"Mang ade kance ni ndak belajar pantun, anye pantunnye ni agak sege. Pantun bukan sembarang pantun," kate Merin.

“Pantun lukmane titu?” kate kance Merin ni tadi, agak tegagau.

"Pukuknye pantun bukan sembarang pantun mang. Serahlah ndak lukmane kamu ngajarinye," lanjut Merin.

“Merin... Merin...! Dengah ni hahaha .....Lah dide nian, mane ade pantun bukan sembarang pantun. Aku ndak ngerjei kaba saje titu... haha,” ragam Pak Beluk. (tik)