Kredit Bank

BELUM lame ini Pak Beluk, Merin, Ujang Kericup, Midun nga Buyung pegi ke kabupaten tetangge. Tujuannye menghadiri acara pernikahan kance ye luar provinsi. Berkat koneksi Merin di dinas terkait. Raban tu ke sane dengan nyiwe bus sekolah milik Pemda setempat. 

Singkat cerite rombongan ni bejalan, Pak Beluk ye jadi supir. Karne bejalan lah malam hari. Ditambah cuaca ye sedang hujan deghas. Merin nga ye lain tetiduk nyenyak. Bahkan Midun lah sampai ngeruh.

"Adak kah lemaknye rombongan bajang ni tiduk. Aku sukagh sakit nyupir sambil ngelap kace mobil ye embunan," kate Pak Beluk bemumut kesal.

Pak Beluk lalu mencari ide supaye kekawannye ni minjak, "Celegar...Celegur...Celetar," bunyi mobil ye pakai rombangan ni ngantami lubang jalan.

Karne tekanjat. Rombongan penumpang di bus sekolah jenis Carry ini ncuguk gale.

"Adak sesenai Pak Beluk. Mobil minjam ini. Mpuk minjam nga pemerintah masih ndak ditanggung jawabkan," kate Merin.

"Awu sesesanai saje bapang Yung. Aku ni masih belum bebunting. Belum galak aku mati bujang," ujar Buyung ikut menanggapi.

"Sengaje aku hantamkah die ke lubang. Mangke kamu bangun. Nanggung aku nyupir mobil ndik be AC amu aghi ujan deghas ni,  maju ngelapi kace. Mangke dide pule ade hiburan di mobil ni. Dide bedie tipnye," keluh Beluk.

"Ude sini nengkala aku ye nyupir. Kaba tiduklah saje Pak Beluk,” kicik Merin. 

“Oiii bebenagh, lum galak aku mati. Kredit bank ni masih lame. Buyung saje ye nyupir. Die lah pengalaman jadi supir travel," kate Ujang Kericup, sebab die tahu Merin dide pacak nyupir. *