Tejebak

PAK Beluk purik, sebab kekantinnye kini lah ngelengitan gale di group WA. Sebab belum lame ini Pak Beluk betaruh dengan kekantinnye urusan politik, kenan sughang ye ngecak jagoan ye menang. Sementare ye lain ngecakah jagoan lain, semngge antakah pemilihan raban tu ngompori Pak Beluk bahwe jagokan die didkah menang. Ngerase lah panas nian hati, Pak Beluk ngajak taruhan. Akhirnye Pak Beluk lawan jeme 10 ughang, kalau kalah cete tebadai Pak Beluk. Anye nasib Pak Beluk sedang bepihak, jagokan Pak Beluk menang telak. Anye sejak jagokan Pak Beluk dinyatekah KPU menang, raban di group WA mendam gale. Lah dide benege Pak Beluk ngeshare berita tentang kemenangan jagokan die, die group. Anye sughang dide ade respon, mendam gale. 

“Oiii kamu penghuni group ini lah keruan KPU lah mutuskah pemenang Pilkada belum,” tulis Pak Beluk di group WA. 

Lah tecangut setengah jam, bahkan lah sejam. Anye dide ade kinah jeme penghuni group ye respon. Mendam gale, Pak Beluk purik nian. Tulis kenan agi “Ade dide penghuni group ini selain aku. Mane die kabah Merin, Taun dengan ye lain”.

Karene lah purik, dikinaki Pak Beluk nomor Hp kekantinnye sikuk – sikuk. Gegalenye oniline, sedang aktif gale. Ukan dide bepaket, anye raban tu dide galak mbalas di group. Lah pusing gale, Pak Beluk ade ide kenan tulis “Oiii kekantin urusan Pilkada lah udim. Aku ni kah ngadekan bakar – bakar ikan dengan ayam, tolong kekantin konfirmasi kudai. Lema aku nyiapkah berghape banyak kekantin pacak datang, bebakaran itu malam minggu ni kele”.

Belum lame Pak Beluk nulis, takteliting mbunyi Hp di group. Gegalenye konfiormasi jeme 10 tu. Pak Beluk langsung nulis agi “Naa kalau mbak itu jadwal lah disepakati, berarti ade gale kamu di group ini. Behubung lah konfirmasi gale, untuk beli bahan bakar – bakaran tu, yang betaruh pemenang Pilkada bayar kudai. Jangan besak gaya saje, waktu mbayar mulai melengit di group. Kalau lanang mbayar ce, kalau kerbai dide perlu bayar”.

Sepi mendadak group tu, raban tu kalah politik dengan Pak Beluk, tejebak.  Ketahuan bahwe online gale, semingge jadi simalekeme urusan taruhan ini.