Motor Bejalan Mundur

motor bejalan mundur belum lame ini pak beluk bukan main riangnye dengan anaknye yung pantit. sebab keluarga kecil dan bahagia ini lagi buka usaha perbengkelan yang bergerak di bidang motor. anye saje pak beluk paham dengan motor tuo atau motor lame lantaran dieni lah galak benari motornye. jadi keruan gale dengan die apa yang rusak, tapi kalu untuk motor baru zaman modern ini die lum paham. singkat cerite pak beluk ngobrol lah dengan merin biase amen ngobrol dengan ngoceni, merin de ketinggalan nyiapkan aiak kupi segelas besak tambah guring pisang angat pule. “merin, aku mbak kini dengan yung pantit lagi buka bengkel motor,” uji pak beluk. “padek itu ade kemajuan, amen akuni masih berputar ijean buah kopi nilah,” jawab merin. “kini lah mulai ramai kekance ke bengkel. anye saje aku anye paham motor tuo amen motor baru injeksi de paham,” uji pak beluk agi. “amen buka bengkel motor ndak paham gale mangke tancinye dapat besak. amen cuma motor tuo tanci dikit biasenya motor tue jeme lah tuo pule makainye,” timbal merin. “au merin, amen jeme tuo motor tuo pacak pule dikibuli dedikitan yang penting barang ganti baru amen beiluk,” timbal pak beluk. “amen itu bukan beiluk nihan amen ganti barang baru. nye beiluk tu, barang yang ampir rusak diiluki, itu namenya pacak diakali,” timbal merin. “au nihan merin aku ni de ndak akal-akalan tapi nyepenting barang laku laris manis,” kate pak beluk. “anye ati-ati ngiluki motor jemeni kalu kene tegur de lemak madak lah tue,” saran merin. “au nihan merin mpaini salah kerjean akuni,” jawab pak beluk. “ngape mu salah pak beluk katenye lah mahir perbengkelan motor,” timbal merin agi. “motor yang diiluki pas idup tancap gas bejalan mundur, pas saje nye punye motor dibelakang, lalu tetumbur dengan buntut motor,” uji pak beluk. “ngape pacak bejalan mundur,” jawab merin. “salah ngiluk’i giginye, maklum motor baru de paham,” terang pak beluk “ati-ati dengan motor baru kalu belum pacak ngiluk’inye. nye punye motortu belum pacak batak motor jalan mundur, jadilah mu saje pak beluk galak bejalan mundur,” timbal merin sambil micingkan matenye. 

Tag

Share

• 
• 
• 
• 
•