Tiduk Kedinginan

SESAGHI kemaghi Pak Beluk curiga ngan gelagat bininye Ndung Yung. Sebab, seaghian itu Ndung Yung dide ndak bemuni ngan Pak Beluk.

Kebile diajak ngicik, Ndung Yung dide ndak njawab, paling cuman ngangguak atau nggiling tula.

Nginak bininye luk itu, Pak Beluk sebenarnye lah paham ngan gelagat Ndung Yung.

Biasanye amun lah diam maju dan dide ndak bemuni agi, pasti ade ye dide setuju dengan Ndung Yung.

Anye, ye buat Pak Beluk curiga tu, tape ye mbuat Ndung Yung purik dan dide ndak bemuni agi ngan lakinye tu.

Karne lah rengam bininye dide ndak bemuni, Pak Beluk langsung betanye sebab lah dide sekenean agi.

"Kudai Ndung Yung, ini serius. Sebenarnye ngape kamu ni. Nide tahan aku kamu panguti saje luk ini. Lukak ndalak rande baru aku ni kele amun lah geregatan," kate Pak Beluk sambil cecengis kecik.

"Ujilah amun lah ke nyelah nian," timbal Ndung Yung ye sebenarnye takut lakinye ndalal rande nian.

"Itulah sangkan kicikka ngan laki ni, tape masalahnye. Amun dide di kicikka dide kah keruan ngan aku," sebut Pak Beluk.

"Kate kamu amun libur luk ini kamu ndak ngajak aku ngan Yung jejalan. Anye kamu masih kina sibuk nontoni HP tula," kate Ndung Yung meluapkah emosinye.

"Ai cacam, empai teringat aku. Melah gampang itu amun ndak jejalan nila," kate Pak Beluk ye empai sadar ngan janjinye.

"Ude mandaklah, lah ke malam pule denie ni. Itulah jangan besak ige uap. Tontoni HP tula ngan kamu. Aku kah tiduk," kate Ndung Yung masuk ke kamar sambil nutup duaghe kencang.

"Ntuk adak panjang gawih ni tadi. Kah lukak tiduk kedinginan agi malam ni," pikir Pak Beluk dalam ati.