Seragi Saje

DALAM Posyandu Lansia kemaghi, Mak Beluk membantu jeme Puskesmas melakukan pengecekan nga kaum sepuh di desanya. Salah satunye, nining Kari ye tinggal kelang tige ghumah nga die.

"Kemane kamu dide tekinak selama tige aghi terakhir ni Wak. Kinak ku tekunci saje ghumah kamu," kate bini Pak Beluk sambil memerikse kadar gule darah Nining Kari.

"Aku temalam keghuma Upik (anak Nining Kari, red) ndak ngasuh cucung. Karne emaknya dang sibuk karne mpai buka warung gorengan nga pop ice," jelas Nining Kari.

"Ohhh Luk itu. Pesan aku, jangan kamu minta buatkah pop ice nga Upik. Karne aku keruan nian base kamu ni kata galaknye benagh minumi setumbak itu," jelas ndung Yung Pantit.

"Yak dide, ndung Yung. Dide benagh aku minta buatkah pop ice nga Upik. Karne itu untuk jualannye. Anye amu ade sisa pop ice di blander. Itu ye aku minum. Rugi amu tecapak," kate Nining Kari.

"Yak Wak. Maksud aku jangan minta buatkah tu, mangke kamu dide minum pop ice tu. Karne kadungan gulenye tinggi. Kalu tambah naik gule darah kamu ni. Itulah tekanannye lah naik jauh njak hasil bulan belakang," jelas ndung Yung.

"Nduk, sebenare ndung Yung padahal sisa di blender ye aku minum tu. Paling cuma seteguk," kate Nining Kari.

"Au cuma seteguk tiap ade sisa. Amu tiap ade sisa kamu minumi. Seragi saje Luk minum sekali banyak Wak," kate bini Pak Beluk.