Ilmu Melengit

PAK Beluk kini lah purik nian dengan kantinnye Merin. Sebab lah due minggu ini die ndalaki Merin, anye yang didalaki dide pernah ade di ghumah. Bahkan diintaikah antak magrib juge dide bedie, lengit dide ade kabar nian.

“Pusing aku dengan mamang kabah Merin ini Yung,” kate Pak Beluk dengan anaknye Yung Pantit.

Yung nulih ke dghi bapangnye, tampak purik nian pendaghian kenan. Yung penasaran ngape bapangnye ndalaki mamang Merin sibuk nian, betanyelah Yung “Ngape die ndalaki mamang tu bapang, tampaknye ade penting nian”

“Au ade penting, anye ini urusan rahasie. Dide bulih kabah tahu, sebab belum cukup umur,” kicik Pak Beluk luk adak. 

Nganing bapangnye ngicik model itu Yung Panit jadi kepo. Die tahu ngakali bapangnye supaye dapatkah rahasei itu  “Kalu bapang tu dide sesenai ndalaki mamang tu, semingge mamang lah ngkinak bapang dulu. Semingge die dide galak nemui bapang”.

“Cak pacak pule kabah, ini urusan jeme tue. Jadi dide perlu kabah keruan nian,” kate Pak Beluk singkat.

“Oiii bapang, akap tadi mamang tu lalu di muke ghumah ini. Anye aku kinai die cecepat nian, bahkan pakai masker. Aku kalau dide keruan model jalannye dide keruan itu mamang Merin,” pancing Yung Pantit.

Agak tekejut Pak Beluk, kenan langsung mutarkah badan sambil betanye dengan anaknye “Bebenar kudai Yung, kalu kabah salah kinak. Sebab aku lah lebih seminggu ngintaikannye dide betemu”.

“Dide bapang, bapangnya nampaknye dibudikah mamang tu. Pasti ade ye urusan bapang dengan die, nampaknye die dide nian galak betemu bapang,” modus Yung Pantit.

“Buntang bange nian Merin ini, bejanji manjangan. Dulu waktui pinjam duit janji due aghi, kini lah due bulan dide mbayar. Didalaki selalu dide bedie di ghumah,” ungkap Pak Beluk purik.

Yung lah keruan kini urusan bapangnye dengan mamang Merin itu. Lah tekeluar ye disumputkah bapangnye. Yung mulai ngicik “Bapang tu kalah ilmu dengan mamang tu. Bapang tu perlu beguru agi, sebab mamang Merin lah paka ilmu melengit. Semingge dide bapang temui, dengan aku betemu”.

Agak ngangat Pak Beluk “Cak mantap nian kabah, aku ni lah putus due lusin guru. Kabah sughang guru saje dide ade”.

Nginak setuasi angat, Yung milih aman, betegak mulai kisit.