Ampir Lebar

Ujang Kericup petang kemaghi dapat kabar kalu kancenye Pak Beluk kene sakit busung. Pas malamnye, Ujang Kericup langsung pegi ke rumah Pak Beluk ndak ngaruhkan kancenye tu.

Sampai di situ, nemu nian Pak Beluk tinggal tetiduk saje di kasur sambil maju ngecaki busung.

"Luk apa ce, adak neman juge nampaknye kaba ni tadi," tanye Ujang.

"Awu ce, lah sengkiap nian lalu tini tadi," timbal Pak Beluk.

"Mangke tape pule pasalnye sangkan kaba kene sakit perut tu," tanye Ujang penasaran.

"Ai biase ce salah makan," jawab Pak Beluk. 

"Ai geganjalan baseka titu. Luk padek nian tape kicikan jeme dituruti gale," Ndung Yung langsung nyaut pule.

"Geganjalan luk ape pule titu bung. Mangke makan tape pule Bapang Yung ni tadi," kate Ujang tambah penasaran.

"Ai makan empedu ikan semah. Anye saking bigalnye, empedu ikan tu ade mbak bai keting (ibu jari kaki, red), diteguknye gale ngan kantin kamu ni," Ndung Yung njelaska.

"Nah, ke ngengape pule nian Bapang Yung. Tape pule parapan kaba sangkan ndak makan tembak itu," Ujang tekejut.

"Ai kate jeme mangku gerut. Amun makan titu dide kah demam agi. Anye amun ini ukane gerut, anye ampir lebar," kate Ndung Yung nimbal agi.

"Hahahaha, memecam saje kaba ni ce. Banyak pule batan kerje asing," Ujang ngakak tetawe karne dide tahan agi ndengar cerite Ndung Yung.