Salah Pilih Pasangan

PAS malam minggu kemaghi Pak Beluk ngan Merin ngikut lomba main domino di rumah jeme pesta. Selame proses main domino tu, rombongan due ni maju becekil. 

"Ui Bapang Yung, luk ape, pacak main dide kamu ni. Ngape dienjuk jalan terus lawan tu," kate Merin. 

"Yak, kalu kaba tula ye dide pacak main. Amun aku ni lah sedap ngecakka hadiah main dom nila," timbal Pak Beluk pede nian.

"Nah mun luk itu, jangan agi diajung jeme tu ngedum saje. Baghih sampai mbak ini kite masih dide dapat nilai," Merin mulai rengam.

Anye, sampai pertandingan udim die bedue ni masih kalah tulah. Cak sekali dide dapat jatah ngedum.

"Nah kan ujiku tadi. Lah ku tebak nian pasti kalah tulah kite. Luk padek nian ngicik lah banyak dapat hadiah," kate Merin bekutuk.

"Udimlah, mungkin kite malam ni sedang lum beruntung. Jadi dide pule ndak pening ige palak," timbal Pak Beluk sambil cecengih. 

"Pacak ngicik tulah kaba tu. Besak kicik saje ini, awak aku selire nian ngan hadiah tu tadi. Salah pilih mandan aku ni tadi. Lemak semandan nga Ujang saje tadi," Merin maju bemumut.

"Wui bajang, amun kaba terti nian dide kah kalah kite ni tadi. Amun jeme terti tu pasti pacak nebak buah kawannye. Buyan kaba ni. Udim melah kite balik," kate Pak Beluk.

"Lah beghungau, main dum masih kalah," Merin masih bemumut.