Besuntik

Lah due aghi ni Pak Beluk beidapan (sakit, red). Ye kali ini, parah juge nian idapan Pak Beluk ni, badannye panas gale.

Saking panasnye, becucuran saje peluh dingin ngeluar njak badan Pak Beluk, udim tu peci gelegasan pule.

Singgenye, njak kemaghi Pak Beluk dide bangun njak badak tiduk. Sambil maju beselimut tebal.

Saking paranye idapan, Pak Beluk nide kungang agi bangun ndak makan, apelagi ngudut tambah nian.

Biasenye, amun empai demam dedikitan Pak Beluk masih ngabiskah nasi sepiring bunju, ngudut masih ndepu. Anye ye kali ini dide nian kungang agi.

Awak Ndung Yung nggulai tape mungkus undak teghung, ulam jeghing mude serile Pak Beluk nian.

"Ai lah parah nian idapan kamu ni Babang Yung, makan lah dide ndak agi kamu ni. Awak sengaje nian aku nggulai serile kamu nian," kate Ndung Yung.

Pak Beluk dide nimbal, kenan maju ngelugut kedinginan.

"Melah aku mbataki besuntik kudai," kate Ndung Yung.

Ndengar ndak dibawe ke dokter dan ndak disuntik pule, Pak Beluk tinggal lu ke nangis agi.

Maklum, kenan ni seumur hidup paling takut nian dengan jaghum suntik tu.

"Ntuk ui, alang ke sakit titu kele. Ade care lain," kate Pak Beluk.

"Yak, besuntik tulah amun ndak mudah ghadu. Dide kah sakit nian," kate Ndung Yung.

"Anye melah amun ke ghadu nian. Pacak mantak gulai mungkus tadi. Rugi nian amun ndik dimakan," kate Pak Beluk masih teringat makan tulah.