Nyari Suare

Malam kemaghi tu Pak Beluk ngan rombongannye datang ke ghumah jeme jamu alias acara akikah. Jadi Pak Beluk dengan rombongan ni sesame datang.

Pas sampai di situ Pak Beluk ni temengak, tibe-tibe ade rombongan Caleg.

"Nah ngape rombongan Caleg ni?" kicik Pak Beluk dalam ati.

Ndik suntih tanyekan Pak Beluk dengan Merin.

"Ce ngape rombongan jeme besak ni datang, tape kendak rombongan ni?" tanye Pak Beluk.

"Mang jeme musim nyakagh duit kini hari, alias nyakagh muke dengan suare," jawab Merin.

"Ay au nian masuk akal nian amen luk itu, cerdik juge rombongan atas ni," timbal Pak Beluk.

"Itulah kabah ndik tau, base jeme tibe-tibe gabung luk ini cakagh suare," Merin ngicik.

"Yak, kalu luk itu kah ulih duit kite balik jak sini, rejeki nian," Pak Beluk lah injik.

"Biasenye, amen jeme-jeme lain juk’i duit nandekan ngajung coblos nomor sekian," lanjut Pak Beluk.

Lum lame nimbal lah Merin, nginak Pak Beluk ngicik ndik beberenti.

"Aseli mang beruntung kite tadi datang," timbal Merin lah beharap besak. 

“Kalu luk itu lemak kite datangi saje tiap Caleg ngumpulkah jeme. Lumayan men banyak Caleg ngadekah pertemuan,” uji Merin ngusulkah rencane ngah Merin.