Geganjalan Tue

Petang kemaghi Pak Beluk neman nian makan. Maklum, bini kenan Ndung Yung nggulai tempuyak undak udang.

Singgenye nasi sepeghiuk dadat lebar peci Pak Beluk. Amun Ndung Yung lah bejijih saje ngan ulah lakinye tu.

"Luk ape bai Bapang Yung, diagak dikit basekah jeme makan ni. Baghih nasi abis sepeghiuk dadat," kate Ndung Yung.

Pak Beluk dide njawab tetape dan langsung pegi ke berende sambil ngiluki gulungan kain sarung ye lah mulai tughun.

Sampai di berende, Pak Beluk tinggal tegulik agi di dasagh sambil melughuskah peghut ye lah luk ke meletup.

Singgenye bangun duduk saje Pak Beluk ni karne lah dide lemak agi ngan busung lah kekeyangan ige.

Nginak lakinye ye dide keruan ikuk ngan palak agi, Ndung Yung ndamping udim tu ngulang bejijih agi.

"Itulah mangku diagak Bapang Yung. Jangan die geganjalan ige jadi jeme. Awak lah tue perembak masih luk budak kecik," kate Ndung Yung semamam.

"Dide pule gegajalan aku tu. Memang lemak nian gulai kamu tu tadi," Pak Beluk nimbal sambil maju ngusuki busung.

"Entah tagekelah ngan kamu. Empuk lemak jangan rakus ige. Kalu meletup belinat. Tinggal tesentak luk tetakan nangke masak agi kamu tu. Hahahaha," uji Ndung Yung sambil ngakak tertawe.