Judul Lagu

judul lagu belum lame ni pak beluk ndak nemui kawan lamenye lihin. kawan pak beluk ini kini lah netap di bengkulu selatan. anye, karne lihin dide jelas nian ngejuk alamat dan lagi pak beluk dide apa jalan di bengkulu selatan. jadi, nanggung pak beluk sesat. lah pening singgenye palak pak beluk karne lah kulu kiligh nelusuri jalan. singkat cerite, pak beluk berenti betanye ngan jeme ye ade di pinggir jalan tu. anye sayangnye jeme tu dide kenal dengan lihin. tambah pening saje jadinye pak beluk, mane ndak nelpon nomor lihin dide pule aktif agi. "besak keciak, tuau mudau, tinau lanang, ndiak bediau jemau dusun ini benamau luak lihin tu," kate jeme tue badah pak beluk betanye. saking banyak badah betanye, siminggenye lah lebih 45 ughang jeme ye ditanyei pak beluk, anye ndik die ye keruan. singkat cerite, pas lah petang aghi, lihin empai nelpon balik. "ui ce, lah di mane kaba, ngape dide sampai-sampai ni," tanye lihin. "ui aku lah njak tadi sampai di manna ni. kate kaba rumah kaba di manna, anye aku betanye dide ade ye kenal dengan kabah," pak beluk njelaska. "kudai, badah kaba tu mbak ini di mane, manna ni besak panjang. kalu lain dusun bai bada betanye tu," uji lihin. "amun aku ndik salah lubuk, tapi dusun ini," kate pak beluk. "yak alang ke jauh kaba sesat tu ce, itu ulu manna. badah aku ni di kecamatan manna nila," kate lihin. "itulah mangke guk mane pule badah manna tu," pak beluk tambah bene. "ui manna tu name kecamatan, lah jauh kaba lalui. ngelipatlah agi kaba tu. kele aku jemput," uji lihin. "ayai kerih nian aku ndalaki kaba ni ce," pak beluk lah kelitakan. "luak judul lagu, salah alamat kaba tu ce," kate lihin ngerjei pak beluk. "ah, buyan kaba ni. jeme lah payah. jangan kiciakkah dengan kawan ye lain. maluan aku," kate pak beluk.

Tag

Share

• 
• 
• 
• 
•