Pantangan Ilmu

ADING bungsu Pak Beluk ye bename Upik kini dang temalam nga keluarge Pak Beluk. 

Ternyate setelah diperhatikan, ading Pak Beluk ye lah berumur kepala tige dan masih gadis itu. Ternyate masih galak bangun nyindang aghi dan malas mandi. 

"Oii Upik ncuguklah. Lah tinggi mateaghi ni. Lukmane nian ndak laku kaba ni amu bangun nyindang aghi ni. Mandi lah malas pule tighah merembas embau," jijih Pak Beluk waktu mbangunkah adingnye. 

"Awu Bapang Yung," kate Upik jak dalam kamar. 

"Oiii. Amu awu tu begerak. Ini masih di katil," pekik Pak Beluk. 

"Sabar saje, Bapang Yung. Maluan nga tetangge tengaghi kuning ni gegaik," kate Mak Beluk. 

"Yak wajar aku marah. Mangke penyakit jarang mandi ni nah. Merembas nian embau badannye. Lukmane lanang kah ribang. Bangse die kesini karne aku diajung mak nyakaghkan batan laki. Amu luk ini lukmane lanang kah galak," gerutu Pak Beluk. 

"Kalu pacak berubah jadi mermaid ibung Upik tu amu kene ayik, bak. Makenye pantang nian kene ayik, pantangan ilmunye," ujar Yung Pantit. 

"Mermaid panuan awu nian die tu. Dasar ibung kaba tu gutuh," Pak Beluk masih bejijih. 

Sementara di dalam bilik si Upik nyicil dalam hati, "Bejijih lah kamu, Kang. Aku mah tidok agi".