Masih Untung

masih untung petang kemaghi pak beluk ngan bininye ndung yung ampir ribut besak. due laki bini ni ampir ribut gegara ndung yung ndik sengaje tebuka pesan whatsapp (wa) di hp pak beluk. sebab, pesan wa di hp pak beluk ni ade foto rande bebibigh abang, badan langsing, gumbak panjang, dan berlagak. ye buat ndung yung tambah angat, di bawah foto tu betulisan "nah, luk ape kekire ce, jadilah ye luk ini batan peghebaian kamu tu," anye, ndung yung dide keruan baseka foto tu dikirim merin ye ternyate salah kirim ke pak beluk. sebab, rencane merin forotu ndak dikirim ke kancenye lihin ye lah lame jadi bujang tue ndik laku-laku. karne lah dide tahan agi dan ati ndung yung lah angat ni, betanyelah kenan dengan lakinye. "hui bapang yung, kah ngape nian merin ngirimi kamu foto rade tu. tape die maskud titu. lah mulai ndak bemain kamu," tanye ndung yung ngangat. ndengar ndung yung ngicik luk itu, pak beluk langsung nginaki hp ndak nginaki pesan njak merin. pak beluk terkejut pule nginak foto dan pesan ye dikirim merin tu. sebab, kenan dide tahu ape-ape. anye, pas pak beluk ndak nelpon merin ndak nanyeka soal pesan tu, rupenye nomor merin dide aktif agi. "kudai ndung yung, aku dide keruan tetape. aku betanye kudai ngan merin. kali salah kirim die tu," pak beluk lah tepeluh liut sambil nyengir kecik. "odimlah kudai kamu banyai ige ragam. kalu lah sekongkol die kamu ngan merin tu. jangan tue ndik nue jadi jeme tu," ndung yung maju semamam. "pokoknye, amun lum bedie kejelasan soal foto itu, jangan aghap aku ke tiduk ngan kamu," uji ndung yung ye lah marah nian. singkat cerite, pas lah akap paginye, merin empai nelpon dan njelaska baseka pesanye itu salah kirim. "nah, ini dengari lah kudai penjelasan merin ni," uji pak beluk sambil ngejukka hp ngan ndung yung. "wai mintak maaf nian ibungan. salah kirim baseka foto tu. amun bapang yung tu ndik banyak kulaghan. bapang yung tu permah ngicik ngan aku baseka cuman ndung yung tulah  di hatinye," kate merin panjang libagh sambil langsung matika telpon. "nyelah salah kirim kan. itulah pastikan kudai mangke marah tu," kate pak beluk. "hehehe, awu ndik sangeje. anye salut aku ngan kamu amun ngunian kate merin tadi," kate ndung yung sambil cecengis.  dalam ati pak beluk “masih untung diakui salah kirim, kalau dide. bakal pecah ghumah ini, balak besak nian. ukan agi perang dunie ketige, lah perang dunie ketujuh nian”.

Tag

Share

• 
• 
• 
• 
•