Calak Tapelalu

PAS balik njak sekul Yung Pantit langsung bercerite dengan bapangnye Pak Beluk. Kenan ni ceritenye marah karne jawaban die disalahkan guru.

"Bak jawaban aku pas pelajaran perkalian di sekul tadi salah gale. Awak peghasean aku benagh," kate Yung bercerite ngan bapangnye.

"Nah, ngape pule luk itu Yung," tanye Pak Beluk penasaran.

"Entah bak, amun kawan aku tadi benagh gale," kate Yung agi.

"Nah, tape pule soal ye dienjuk guru tadi nak" tanye Pak Beluk.

"Anu bak, (sebutkan perkalian apa saja yang kamu tahu)," uji Yung.

"Cube kaba ceritekan kudai jawaban kance kaba tadi," kate Pak Beluk.

"Amun Bedul tadi njawab luk ini bak. 1x1=1, 2x1=2, 3x1=3," Yung njelaskah.

"Nah jawaban kaba tape Yung," Pak Beluk betanye.

"Jawaban aku tadi, kali bata, kali mutu, kali mantan. Benagh aku tu kali-kali gale," timbal Yung.

"Yak entah nian pule amun luk itu Yung. Sege nian kabah. Calak tapelalu itu, jadi bigal luk ndung kabah tulah," kate Pak Beluk rengam ngan anaknye.

"Tape kate kabah," Ndung Yung langsung nyaut.

"Anu yang, ade jeme ngirimi tanci, kele kite ambik di rekening," Pak Beluk langsung ndalak tangguh mangke ndik perang dunie. *