Gigi Serap

PAK Beluk sibuk, masuk keluagh di dalam gumah. Sibuk pule bukak lemari badah kenan nyimpan ragian, sampai kicik bininye ndung Yung dide dianingkah agi. Bininye bingung, ngengape lakinye ini sibuk luar biase nian. Saking pusingnye, Ndung Yung betegak nian ngecakh lakinye.

“Oii bapang Yung ngengape kabah dipantau dide nganing agi ini, sibuk nian,” tanye ndung Yung.

Agak tekejut Pak Beluk, tapi kenan njawab sambil nglepakah kecakan bininye “Dide aku agi ade kerje penting. Lepaskah tangan kabah”.

Ndung Yung ngelepaskah tangannye ke tangan lakinye. Anye die masih bingung, untuk ngindarkah bebalah die diam saje kudai. Anye die terus mantau kerje lakinye. Lah duduk Pak Beluk ngidupkah lampu tembak nian, nampaknye pakam nian kerjenye ini.

Sambil bemumut Pak Beluk ngeluarkah ragian “Batal gale rencane malam ini, buyan nian gedaup ini. Semegi ke balak ini”.

Tampak Pak Beluk ngeluaghkan bor model gerinde lebuk, sibuk nian. Ndung Yung nicik “Kah mbuati ape kabah ini bapang Yung. Siape tahu aku pacak nulungi, jangan bemumut saje”.

“Udimlah, didekah kabah keruan nulung,” jawab Pak Beluk.

Sambung ndung Yung agi “Katenye kabah kah ke badah jeme kagukan, ke musikan di dusun sebelah. Ngape belum berangkat, lah malam dunie ini”.

“Inilah masalahnye, aku tadi lah besiuk. Sambil besiuk makan juadah, tetibe gigi aku patah. Jadi rusak segale rencane,” jawab Pak Beluk purik.

Nganing kicik lakinye ndung Yung tatawe, ngerti die ye mbuat lakinye sibuk. Gigi Palsunye patah, tapi die ngicik agi “Kan ade gigi serap mu, pakai kudai itu sementare”.

“Gigi serap aku lah patah pule, semingge dide pacak ke jeme rami aku ini,” kicik Pak Beluk ngagukah banguknye ke bininye. Semingge mbuat ndung Yung tetawe bias.