Salah Jeme

salah jeme lum lame ni pak beluk dapat kabar serul kance lamenye ye lame merantau ndak balik. saking lah lame ndik betemu, pak beluk langsung datang ke bandara jemput kancenye tu. singkat cerite, pas aghi penjemputan, serul tu langsung nelpon pak beluk. serul ngicik ngan pak beluk tunggu saje bawe tangge bandara. karne lah lame ndik betemu, pak beluk ni lah agak lupe ngan wajah serul ni. jadi, pas betemu ngan jeme di palak tangge bandara tu, pak beluk sangke lah nyelah kancenye. anye, pak beluk sebab jeme ye di sangke kawannye tu lah tambah tinggi, tambah putih dan bemate ijang. "hui kance, ndik sangke aku, tambah belagak saje kaba mendam di kota ni. luar biase nian, besak tinggi putih kaba ni mbak ini," kate pak beluk sambil langsung meluk jeme ye mendam di palak tangge tu. "what (ape, red)?," kate jeme tu ye ternyate turis asing. "jangan sombong nian kaba kance. uji tadi nunggu di palak tangge ni kaba. mase kaba ndik kecinean agi ngan aku," pak beluk maju bejijih panjang libagh. "i'm sorry, who are you (maaf, sape kaba ni, red)?," turis bingung. "wai ndik sihat kaba ni, mase ngan kance lame ndik kenal agi. aku lah keriah njemput kaba di sini, mangke kaba luk ini," kate pak beluk. karne lah rengam, turis tu langsung larat pegi ninggalkah pak beluk. udim tu ndik lame serul datang nemui pak beluk. serul ye empai datang langsung ndamping guk pak beluk. "ui ce ngape ini, salah jeme kaba ni ce," kate serul. "ui ce, aku kire tadi kaba bele ini ce," uji pak beluk ye agak maluan. "itulah amun ndik keruan tu betanye ce. ndik nian berubah kaba ni," serul ngiciki pak beluk. "aku kire tadi lah nyelah nian kaba titu tadi ce," uji pak beluk agi. "kinaki pule bai, amun jeme njak dusun ni merantau ndikah banyak nian berubah. amun itu tadi lah nampak nian sekali kinak jeme njak luar negeri," serul njelaska. "hehehe, ude melah balik kite. kele lengit aku di sini kele," kate pak beluk sambil kelelenyum. 

Tag

Share

• 
• 
• 
• 
•