Resie Tebongkar

Petang kemaghi Merin beghusik ke rumah kance lamenye Pak Beluk. Anye pas sampai di situ, Merin tekejut bukan main ade muni debuk-debuk di belakang rumah Pak Beluk.

Merin takut Pak Beluk sedang melagei bininye Ndung Yung. Sebab, selame ini Pak Beluk maju ngicik base die ndik pernah takut ngan bininye.

Jadi pikir Merin, saking beraninye Pak Beluk ngan bini, jadi rajin pule die melagei bini.

Karne takut tambah riuh, jadi tanpa pikir panjang Merin langsung nggedor duaghe rumah Pak Beluk.

Anye karne gedor dan di panggil dide ndengar, Merin langsung beinisiatif manggil jalan belakang rumah Pak Beluk.

Singkat cerite, pas sampai di belakang rumah Pak Beluk, Merin tekejut bukan main nginak kancenye tu sedang bekukah nyesah baju.

"Hui Bapang Yung, kah neman die bai," kate Merin ye langsung kelelenyum nginak Pak Beluk lah basah gale.

"Ui kaba ce, ngape ndik nelpon kudai amun ndak beghusik," kate Pak Beluk sambil nyengir.

"Yak amun aku nelpon kudai tadi, dide ke keruan aku base kaba rajin nyesah," timbal Merin agi.

"Anu ce, tunggulah di depan, jangan bias nian ngicik ni. Ndung Yung masih ade di dalam tu," Pak Beluk langsung ngajung Merin nunggu di depan.

"Uji berani nian ngan bini ce, ini tape die amun masih bepapuk nyesah," kate Merin.

"Hehehe, dediam pule ce. Aku tu ndik takut ngan bini, anye jeme ghumah tu lebih berani saje njak aku," uji Pak Beluk agi.

"Udimlah Bapang Yung, resie tebongkar gale kini. Besak uap saje kaba ni selame ni," kate Merin sambil balik ke depan.