Nyakat Kopi

nyakat kopi kemaghi pak beluk berebut mulut ngan kancenye merin. die due sekawan ni berebut mulut gegara kopi. menurut merin, amun jeme lah rajin ige ngopi pasti kene sakat dengan kopi tu. sebagai contohnya, amun dide ngopi sekali saje dalam seaghi, mangke ye bersangkutan langsung palak sakit. anye, pak beluk ndengar cerite merin tu dide terime. mase manusie pacak kene sakat dengan kopi. "ndik bedie ceritenye jeme pacak kene sakat dengan kopi. cuman mitos saje titu," kate pak beluk. "nah, ujikanlah kudai amun kaba dide percaye ce," timbal merin. singkat cerite, pak beluk langsung balik dan singgah ke pekan. sampai dipekan, pak beluk langsung ndalak kopi dusun kenan langsung beli sekilo, udim tu kenan beli gule sekilo. pas balik ke rumah, ndung yung langsung curiga nginak gelagat lakinye pak beluk ye tetibe mbeli kopi ngan gule banyak nian. "kudai bapang yung, kah ngengape kamu sangkan beli kopi ngan gule banyak tegale ni. ukan ndak bekagukan (pesta, red)," tanye ndung yung. "dide, batan ndak aku nila," timbal pak beluk singkat. "yak, kalu bucur pule bai amun kamu sughang minumi setembak itu," kate ndung yung mulai rengam. "ndik aku tu ndak mbuktikan kicikan merin, base ndik bedie cerite jeme pacak di sakat kopi. ini die contohnye, aku kudai nyakat kopi, bukan di sakat kopi," pak beluk mulai njelaska. "wai alang ke bigal kamu ni bapang yung, maksud jeme di sakat kopi tu bukan die luk itu. amun jeme lah biase ngopi, mangke biasenye die harus ngopi empuk sekali sehari. itulah namenye sakat kopi, bukan dide ye luk kerje jeme bigal luk kamu ni," ndung yung marahi lakinye. "ui luk itu," pak beluk sambil ngangguk-ngangguk. "mati pacak kamu amun mansak kopi tu sekilo sekaligus, bukan sakatnye agi," uji ndung yung rengam.

Tag

Share

• 
• 
• 
• 
•