Bebujukan

BELUM lame ni Pak Beluk dengan ndung Yung Pantit bekusik ke dusun tetangge yang ndak jamuan. Pak Beluk yang tekenal peragam, anye tibe-tibe mendadak pendiam.

Ndung Yung Pantit agah heran, ngape lakinye ini nide luk biasenye. Penuh dengan tande tanya ndung Yung ni.

Jadi pas lah udim ke ghumah jeme jamuan tu tadi, ndung Yung nanye "Ngape nide luk biasenye tingkah laku kabah".

"Nide luk biasenye luk Mane," Pak Beluk cacak ndik keruan.

"Anu bapang Yung, biasenye kabah peragam benagh anye ngape tibe-tibe ngejetu ate lah di badah jeme rami," Mak Beluk agak heran.

Penuh dengan keraguan Pak Beluk ndak jawabnye, anye tepakse dijawab rupukan bibay sendighi, walau masih gagup ngiciknye "Anu ndung Yung sebenernye, jangan marah anye au".

"Aku tadi sangkan ndik banyak ragam maluan, soalnye ade masa lalu ku dulu, itukah sangkan ndiam," jawab Pak Beluk.

Dengae Pak Beluk ngicik luk itu lah mulai ndung Yung agak panas, mukenye lah mulai cemetut. Nginak bininye lah mulai ade tande bakal balak. Pak Beluk mulai ndamping, sambil mbelai ngicik kenan “Itukan mase lalu aku, ye mase aku kini dan seterusnye dengan kabah. Buktinye aku dide banyak ngicik tadi ndung Yung, sebab aku didekah malukah kabah”.

“Au nian ape, serius nian kabah ngicik tu,” timbal ndung Yung lelinyum sambil nunduk mule. Tegas Pak Beluk “Pastilah, kabah selamenye. Sampai ajal misahkah kite, bahkan berharap sampai di surge nanti kabahlah bidadariku”. Nganing kicik lakinye, oiii ukan main anjam ndung Yung. Dalam ati Pak Beluk “Aiii bajang, masih die mintak bebujukan tue gedaup ni”.