SAAT udem pengajian rutin desa. Pak Beluk ngobrol nga kawan lamenye bename Gayung Tambun.
Ceritenye, Gayung Tambun ini mpai keluar njak "pesantren" karne OTT menerima suap.
Dalam obrolannye, Gayung Tambun ye mantan anggota dewan betanye nga Pak Beluk. Tentang mane ye paling hebat di antara beberapa jabatan.
"Nak betanye Pak Belum. Mane ye lebih hebat. Aku ye dulu jadi anggota dewan ape menteri kabinet," tanye Gayung Tambun.
"Ye lebih hebat pasti kaba, ce. Menteri dide berani ngajung-ngajung kaba. Amu kaba dulu kan pacak ngajung-ngajung menteri. Misalnye ngajung menteri terkait memperbaiki pendidikan," jelas Pak Beluk.
"Guk nian pule awah. Amu nga KPK, mane hebatnye nga aku ye dulu jadi wakil rakyat. Cak aku dulu ditangkap tian tulah," Gayung Tambun betanye agi.
"Sebenarnye masih hebat kaba juge, ce. Waktu kaba duduk paini kan ikut ngenjuk suare waktu pemilihan ketua KPK. Sementara, kaba dulukan dide dipilih KPK," kate Pak Beluk.
Mendengar pernyataan Pak Beluk, si Gayung Tambun ye memang pepunjunlan alias pepujian ini makin besak palak.
Saking besak palaknye, die dengan khilaf kembali betanye mane ye lebih hebat.
"Amu aku dulu nga nabi, kire-kire mane ye lebih hebat," tanye Gayung Tambun ye sebenarnye dide serius.
"Masih hebat kaba juge, ce," jawab Pak Beluk singkat.
Mendengar jawaban Pak Beluk. Gayung Tambun ini sampai perangak. Die ndik pecaye jawaban itu muncul njak kawan lamenye itu.
"Mestahil pacak luk itu, Pak Beluk. Cuma memain aku tadi. Ngape pacak kaba jawab luk itu, lukmane sampai penafsiran kabah hebat tepelalu titu ce," Gayung Tambun balik betanye.
"Yak pacak saje kaba dulu tu lebih hebat jak nabi. Alasannye, nabi tu takut benagh bebuat duse. Sebab takut nga Allah SWT, sementara kaba dulu dide bedie tetakutnye nga tuhan," jelas Pak Beluk lughus saje.
"Lah keruan suap tu perbuatan duse sekaligus melanggar hukum negara. Anye masih kaba lakukan dan dianggap rezeki. Artinye kaba dulu tu dide takut nga tuhan. Makenye dalam tanda kutip lebih hebat jak nabi," tambah Pak Beluk.