LAH semiggu ini Pak Beluk uring – uringan tip akap, kenan lah rengam nian. Sebab tiap akap ndung Yung Pantit terus bejijih tentang urusan belanje ghumah. Kenan lah pusing tegalau, sementare kah ke badah kance raban tu sedang temalam di kebun kapuh. Semingge Pak Beluk tinggal tejenggu saje nganikah bininye merumit panjang kali libagh kali tinggi. Akap ini ndung Yung lah gemimul agi, semingge Pak Beluk mulai purik pule.
“Cukah kabah pegi kudai ke luar ghumah, ndalak lukak. Ade tiap akap nunggu nasi gulai masak njenggu nunggui rukuk dengan kupi tulah,” kate ndung Yung mulai bejijih.
Pak Beluk masih mendam, ndung Yung masih nderudut ngicik model motor putus rem “Kinilah kah masuk sekul, Yung kah pakain, buku, tas baru gale. Kah mbeli pakai ape die kalau kamu terus mendam dide ade penghasilan bapang Yung”.
Masih mendam, ndung Yung makin panas dide ade balasan. Bini Pak Beluk laju agi ngumilnye “Maluan pule dengan anak jeme banyak ini, mase anak sutik dide pacak dipenuhi kebutuhan die sekul”.
Pak Beluk lah mulai naik sepaning, kenan mulai ngicik “Oii duit untuk Yung sekol itukan lah ade die. Tinggal belikah saje, ntah pule kalau duit itu lah dihabiskah beli ini, beli itu online kapuh. Hampir tiap aghi datang paket, duit njak mana kabah. Kalau ukan makai duit untuk urusan sekol Yung ye lah aku njukah”.
Pak Beluk ye belum puas mulai lah pasang aksi nian “Jadi jeme itu nyadar dighi. Jangan awak pisak memencak jeme kaye, becermin juge kabah”.
Nganing lakinya mulai agak melawan ndung Yung mulai tambah ngegas “Kalau au nian ngape, laki itu harus menuhi kebutuhan bininye. Ukan hanya ngejuk duit dikit, tapi ngitungnye njelumit nian. Tugas kabah nian sebagai laki menuhi kebutuhan bini dengan anak itu”.
Nganing bininye terus melawan Pak Beluk mulai lah kebakaran hati nian “Oii kabah nyadar, inaki hidup. Jangan ncungak, ape kire aku anjam nian tiap akan di ghumah. Aku pusing tegalau, tapi kah lukmane belum ade lukak. Sementare kabah terus njerumit manjangan, aii kabah. Kah dimbakmane ini”.
Nginak lakinya panas, ndung Yung mulai agak mendam. Sebab die keruan lakinye ini kalau lah ngamuk dide tetanggung.
Tapi die masih panas hatinye, masih bejijih juge “Maksud aku kabah ndalak kegiatan kapuh, supaye dapatkah duit walau dikit. Jangan hanye mendam, didekah ade lukak datang kalau dide didalaki”.
“Kabah ini, ayaiyai oii. Kah naikah darah nian. Manec kabah aku lemak nganing kicik bemimut tiap akap, jangan asal ngicik manjang. Kabah ye lemak, karena tukang kicik itu tukang ye lemak. Tapi tukang aningkah jadi dimak, jadi mbak ini saje ndung Yung. Ape kendak kabah kalau aku kah kerje atau dide, aku lah nyagu. Kini iluk jadi karut jadi, atur – aturlah nian,” tegas Pak Beluk pasang udim.
Nganing mbak itu ndung Yung mendam, sebab dia keruan perangai lakinya kalau gas full model ini.