Belum lame ini Pak Beluk dengan Merin becekil melalui WhatsApp (WA). Ntah sape yang benar sape ye salah, kicikan beduetu betimbalan saje. Sedangkan yang lain de ade ngenjuk komentar. Ape de nginak WA ape luk mane.
Anye saje yang diucapkan Pak Beluk betul kate Merin. Jadi diikutinyelah perintah Merin. Anye saje lah seminggu timbul jawaban kance Merin, salah katenye jawaban Pak Beluk. Yang benar care lame.
Bepikirlah Pak Beluk, die ade barang bukti nye dipercaye dalam WA groupnye. Singkat cerite kerje kurang nyambung.
“Mulailah Wa di group, Minggu muke libur kerje,” kate Merin.
“Libur ape pule itu, peghaseku, tanggal di almanakni hitam gale biasenye merah,” jawab Pak Beluk.
“Bukan iluak itu Pak Beluk, kalu almanakmu salah,” timbal Merin agi.
“De salah almanakni, aku lah nginak nihan,” uji Pak Beluk agi.
“Woi Pak Beluk die tu empat hari libur, due hari tetap masuk luk biase,” uji Merin agi.
“De Merin, aku empat hari ndak kerje bada lain, due hari mpai masuk luk biase,” uji Pak Beluk agi.
“Iak Pak Beluk lah nyelah katemutu. Empat hari pacak kerje bada lain, due hari masuk iluak biase,” jawab Merin agi.
“Iak berarti tetap enam kerjeni, empat aghi kerje bada lain, due aghi lagi kerje bada Merin iluak biase, nyelah kan Merin,” uji Pak Beluk.
“Nyelah itu, de kan salah lagi. Tapi cerite muni Pak Beluk cuman salah sambung, de kah tetawe dikinak jeme banyakni,” timbal Merin agi sambil ngasah batu abang.