PETANG kemaghi pas bersihkan pasigh rumah, Pak Beluk nanggung disengati medu.
Karne lah dide tahan agu sakit gale, kenan langsung pegi ke dokter.
"Tolong dok, tolong nian. Sakit gale badan aku ni lantak disengati medu," kate Pak Beluk sambil maju meringis kesakitan.
"Tenang pak. Kele kite obati gale," kate Dokter.
"Yak luk ape agi ndak ngubatinye. Lah larat gale pule medu tadi dok," kate Pak Beluk.
"Ukan medu ye diobati tu. Guk mane kamu sengat medu tadi. Pacak kite obati," kate dokter.
"Ui awu. Di belakang ghumah pak, pasigh batang mangga," timbal Pak Beluk agi.
"Ui di badan kamu ni. Ye entangan mane disengati medu tadi. Tape gati pule amun ke ngubati bada kamu disengat tadi," Dokter mulai panas.
"Ui itu, jaghi keting ngan tangan aku ni dok," uji Pak Beluk agi.
"Ye manenye," dokter tambah marah.
"Yak keruan adak ngan aku dok. Same gale medu tu. Ndik bedie bedahnye kinakku," timbal Pak Beluk agi.
"Ai enath pule bai, kendak kamulah pak. Datangilah agi medu tadi. Udim tu sempalka mulut kamu tu ke sarangnye tu," uji dokter rengam.
"Yak ngajung mati kamu tu dok. Aku ni ndak beobat sangkan ke sini," timbal Pak Beluk.
"Itulah amun ndak beobat tiduklah di katil tu. Pacak aku obati," uji dokter sambil nyuntik Pak Beluk.
Ngikinak dokter lah ringam Pak Beluk mendam, dalam ati kenan kalau melawan kele disuntik matikannye. Balak besak kele, die dide berghani melawan kalau dokter lah ringam.